ഏതൻസ് വോളി ലീഗ്: കെ.സി റാംറോഡ്സ് ജേതാക്കൾ
താമരശ്ശേരി:
പരപ്പൻപൊയിൽ ഏതൻസ് സ്പോർട്സ് ക്ലബ്ബ് സംഘടിപ്പിച്ച നാലാമത് കെ സി മാമു മാസ്റ്റർ സ്മാരക വോളിബോൾ ടൂർണമെന്റിൽ തച്ചറക്കൽ ബ്രദേഴ്സിനെ തോൽപിച്ചു കെ.സി റാം റോഡ്‌സ് ജേതാക്കളായി.വോളി ലീഗിന്റെ ഉദ്ഘാടനം പഞ്ചായത്ത്‌ പ്രസിഡന്റ്‌ ജെ.ടി. അബ്ദുറഹ്മാൻ മാസ്റ്റർ നിർവഹിച്ചു. ആദ്യ മത്സരത്തിന്റെ ഉദ്ഘാടനം ബ്ലോക്ക്‌ പഞ്ചായത്ത്‌ ആരോഗ്യ വിദ്യാഭ്യാസ സ്റ്റാൻഡിങ് കമ്മറ്റി ചെയർമാൻ പി.കെ. സുനീർ നിർവഹിച്ചു. സംസ്ഥാന തലത്തിൽ മികവ് തെളിയിച്ച വില്ലേജ് ഓഫീസർ കെ.പി അബ്ദുൽ ഗഫൂർ, ആര്യ, നവനീത്, വോളിബോളിനു നൽകിയ സംഭാവനകൾ പരിഗണിച്ചു സി.കെ. അബ്ദുറഹ്മാൻ, ഇ.കെ. കുമാരൻ, ഏതൻസ് ക്ലബ്ബിന്റെ പുനരുദ്ധാരണത്തിൽ നിർണായക പങ്ക് വഹിച്ച ക്ലബ്ബിന്റെ അംഗങ്ങളായ കെ.സി താഹിർ, പി.കെ സുഹൈൽ, ഷഫീക്ക് പേപ്പു, വോളി ലീഗിന് മുന്നിൽ നിന്ന റിയാസ് ഖാൻ എന്നിവരെ ഉപഹാരം നൽകി ആദരിച്ചു. പഞ്ചായത്ത്‌ സ്റ്റാന്റിംങ് കമ്മറ്റി ചെയർമാൻ എം.ടി അയൂബ്ഖാൻ, എ.സി ഗഫൂർ, എം.ടി റിയാസ്, എ.പി മിഥുലാജ് എന്നിവർ ഉപഹാര സമർപ്പണത്തിന് നേതൃത്വം നൽകി.
ജേതാക്കൾക്കുള്ള ട്രോഫികൾ മുൻ ഇന്ത്യൻ താരം കിഷോർ കുമാറിന്റെ നേതൃത്വത്തിൽ വിതരണം ചെയ്തു. പാലക്കൽ റഷീദ് അധ്യക്ഷത വഹിച്ചു. ചടങ്ങിൽ പി സി അസ്‌ലം സ്വാഗതവും കെ.സി. ഷാജഹാൻ നന്ദി പറഞ്ഞു.
