ടി.ഡി.സെബാസ്റ്റ്യൻ്റെ നിര്യാണത്തിൽ താമരശ്ശേരി പൗരാവലി അനുശോചിച്ചു
താമരശ്ശേരി:
താമരശ്ശേരി പ്രസ് ക്ലബ്ബ് മുൻ പ്രസിഡൻറ് ടി.ഡി.സെബാസ്റ്റ്യൻ്റെ നിര്യാണത്തിൽ താമരശ്ശേരി പൗരാവലി അനുശോചിച്ചു. താമരശ്ശേരി പ്രസ് ക്ലബ്ബ് സംഘടിപ്പിച്ച അനുശോചന യോഗം
താമരശ്ശേരി ഗ്രാമപഞ്ചായത്ത് പ്രസിഡന്റ് ജെ.ടി.അബ്ദുറഹിമാൻ ഉദ്ഘാടനം ചെയ്തു. മലയോരജനതയ്ക്ക് വേണ്ടി വാർത്തകളെഴുതി ജനകീയ വിഷയങ്ങളിലേക്ക് അധികൃതരുടെ ശ്രദ്ധയാകർഷിച്ച ടി.ഡി.സെബാസ്റ്റ്യൻ മാതൃകാപരമായ മാധ്യമപ്രവർത്തനമാണ് കാഴ്ച വെച്ചതെന്ന് അദ്ദേഹം അഭിപ്രായപ്പെട്ടു.
വീഡിയോ കാണാം ∆താമരശ്ശേരി പ്രസ്‌ക്ലബ്ബ് പ്രസിഡന്റ് ഉസ്മാൻ പി.ചെമ്പ്ര സ്വാഗതഭാഷണം നടത്തി. ടി.ആർ.ഓമനക്കുട്ടൻ ചടങ്ങിൽ അധ്യക്ഷനായിരുന്നു. അജയ് ശ്രീശാന്ത് അനുശോചന പ്രമേയം അവതരിപ്പിച്ചു.
മലയോരജനതയുടെയും കർഷകരുടെയും പ്രശ്‌നങ്ങളിൽ ഇടപെട്ട് സാധാരണക്കാരുടെ ശബ്ദമായി ജീവിച്ച മാധ്യമപ്രവർത്തകനെയാണ് ടി.ഡി.സെബാസ്റ്റ്യൻ എന്ന ബേബി മാസ്റ്ററുടെ വിയോഗത്തിലൂടെ സമൂഹത്തിന് നഷ്ടമായതെന്ന് താമരശ്ശേരി പ്രസ്‌ക്ലബ്ബ് സംഘടിപ്പിച്ച അനുശോചനയോഗം അഭിപ്രായപ്പെട്ടു. സമാന്തര വിദ്യാഭ്യാസരംഗത്ത് പതിറ്റാണ്ടുകൾ പ്രവർത്തിക്കുകയും പിന്നീട് കോടഞ്ചേരി, തിരുവമ്പാടി, താമരശേരി, പുതുപ്പാടി തുടങ്ങിയ സ്ഥലങ്ങൾ കേന്ദ്രീകരിച്ച് പ്രാദേശിക പ്രവർതത്തനം ജീവിതസപര്യയാക്കുകയും ചെയ്ത സെബാസ്റ്റ്യന്റെ ജീവിതം നാടിന് ഒരു മാതൃകയാണെന്ന് യോഗം കൂട്ടിച്ചേർത്തു.
ബി.ജെ.പി.സംസ്ഥാന സമിതിയംഗം ഗിരീഷ് തേവള്ളി, സി.പി.എം താമരശ്ശേരി ഏരിയാകമ്മിറ്റിയംഗം സി.കെ.വേണുഗോപാലൻ, സി.പി.ഐ ടൗൺ ബ്രാഞ്ച് സെക്രട്ടറി വി.കെ.അഷ്‌റഫ്, ജനതാദൾ മണ്ഡലം സെക്രട്ടറി പി.സി.റഹീം, യൂത്ത് കോൺഗ്രസ് മണ്ഡലം സെക്രട്ടറി വി.കെ.എ.കബീർ, മജീദ് താമരശ്ശേരി, വിനോദ് താമരശ്ശേരി, പി.കെ.സി.മുഹമ്മദ്, സോജിത്ത് കൊടുവള്ളി, വി.ആർ.അഖിൽ എന്നിവർ സംസാരിച്ചു.
