പുനീത് രാജ് കുമാറിന് യാത്രാമൊഴി നൽകി ആരാധകർ

 

ബംഗളൂരു:

കഴിഞ്ഞ ദിവസം അന്തരിച്ച കന്നഡ സൂപ്പർ താരം പുനീത് രാജ് കുമാറിന് കണ്ണീരിൽ കുതിർന്ന യാത്രാമൊഴി. പുനീതിൻ്റെ സംസ്കാരം നടന്നത്  അച്ഛൻ രാജ്‌കുമാറിന്‍റെ സമാധിക്ക് അരികിലാണ്. കൺഠീരവ സ്റ്റുഡിയോയിൽ ആണ് പുനീതിനും അന്ത്യ വിശ്രമം ഒരുക്കിയത്. പുലർച്ചെ നാലു മണിക്ക് കണ്ഠീരവ സ്റ്റേഡിയത്തിലെ പൊതുദർശനം അവസാനിപ്പിച്ചു. അമെരിക്കയിലുള്ള മകൾ രാത്രി ബംഗളുരുവിൽ എത്തിയിരുന്നു. വിലാപയാത്രയായി 11കിലോമീറ്റർ അകലെയുള്ള സ്റ്റുഡിയോയിലേക്ക് കൊണ്ടുപോയി. ഞായറാഴ്ച രാവിലെ 7.30 യോടെ സംസ്കാര ചടങ്ങുകൾ പൂർത്തിയായി.

ആരാധകർ ഒന്നടങ്കം എത്തുന്നത് ക്രമസമാധാന പ്രശ്നം ആകുമെന്ന സർക്കാരിന്‍റെ അഭ്യർഥന കണക്കിലെടുത്താണ് സംസ്കാര ചടങ്ങുകൾ പുലർച്ചെയിലേക്കു മാറ്റിയത്. അടുത്ത കുടുംബാംഗങ്ങൾക്ക് പുറമെ മുഖ്യമന്ത്രി ബസവരാജ് ബൊമ്മെ, മുൻ മുഖ്യമന്ത്രി സിദ്ധരാമയ്യ, മന്ത്രിമാർ, കന്നഡ സിനിമയിലെ പ്രമുഖ നടീനടന്മാർ തുടങ്ങിയവർ ചടങ്ങുകളിൽ പങ്കെടുത്തിരുന്നു.