കൂനൂർ ഹെലികോപ്റ്റർ അപകടം: ക്യാപ്റ്റൻ വരുൺ സിംഗും ഓർമ്മയായി
ഊട്ടി:
കൂനൂരിൽ ഹെലികോപ്റ്റര് അപകടത്തില് ഗുരുതരമായി പരുക്കേറ്റ് ചികിത്സയിലായിരുന്ന ഗ്രൂപ്പ് ക്യാപ്റ്റൻ വരുൺ സിങ്ങും മരണത്തിന് കീഴടങ്ങി. വ്യോമസേനയാണ് മരണം സ്ഥിരീകരിച്ചത്.
വെല്ലിങ്ടൺ സൈനിക ആശുപത്രിയിൽ ചികിത്സയിലായിരുന്നു വരുൺ. കഴിഞ്ഞ ബുധനാഴ്ച ഉച്ചയോടെയാണ് രാജ്യത്തെ നടുക്കിയ ദുരന്തമുണ്ടായത്. സംയുക്ത സേനാ മേധാവി ബിപിന് റാവത്ത് അടക്കം സഞ്ചരിച്ച ഹെലികോപ്ടര് ഊട്ടിക്ക് അടുത്ത് കൂനൂരില് തകര്ന്നു വീഴുകയായിരുന്നു. ബിപിന് റാവത്തിന് പുറമെ അദ്ദേഹത്തിന്റെ ഭാര്യ മധുലിക റാവത്ത്, ബ്രിഗേഡിയര് എല്.എസ് ലിഡ്ഡര്, ലെഫ്.കേണല് ഹര്ജീന്ദര് സിങ്, എന്.കെ ഗുര്സേവക് സിങ്, എന്.കെ ജിതേന്ദ്രകുമാര്, ലാന്സ് നായിക് വിവേക് കുമാര്, ലാന്സ് നായിക് ബി സായ് തേജ, ഹവീല്ദാര് സത്പാല് എന്നിരും അപകടത്തിൽ മരണപ്പെട്ടിരുന്നു.
