കോടിയേരി ബാലകൃഷ്‌ണൻ വീണ്ടും സിപിഐഎം സംസ്‌ഥാന സെക്രട്ടറി
കൊച്ചി:
കോടിയേരി ബാലകൃഷ്‌ണൻ വീണ്ടും സിപിഐ എം സംസ്‌ഥാന ഘടകത്തെ നയിക്കും. കൊച്ചിയിൽ സമാപിച്ച സംസ്‌ഥാന സമ്മേളനം സെക്രട്ടറിയായി കോടിയേരിയെ ഐകണേ്‌ഠ്യേന തെരഞ്ഞെടുത്തതായി ജനറൽ സെക്രട്ടറി സീതാറാം യെച്ചൂരി പ്രഖ്യാപിച്ചു.. തുടർച്ചയായ മൂന്നാം തവണയാണ്‌ കോടിയേരി സംസ്‌ഥാന സെക്രട്ടറിയായുന്നത്‌. 70 കാരനായ കോടിയേരി പൊളിറ്റ്‌ബ്യൂറോ അംഗവും ദേശാഭിമാനി ചീഫ്‌ എഡിറ്ററുമാണ്‌. 88 അംഗ സംസ്‌ഥാന കമ്മിറ്റിയേയും, 17 അംഗ സെക്രട്ടറിയറ്റിനെയും സമ്മേളനം തെരഞ്ഞെടുത്തു.
2015ൽ ആലപ്പുഴ സമ്മേളനത്തിൽ പിണറായി വിജയൻ സ്‌ഥാനം ഒഴിഞ്ഞപ്പോഴാണ് കോടിയേരി ആദ്യം നേതൃപദവി ഏറ്റെടുത്തത്. തുടർന്ന്‌ 2018ൽ തൃശൂരിൽ ചേർന്ന സമ്മേളനത്തിലും കോടിയേരി സെക്രട്ടറിയായി തെരഞ്ഞെടുക്കപ്പെട്ടു. അസുഖത്തെ തുടർന്ന്‌2020 ൽ ഒരു വർഷത്തോളം സെക്രട്ടറി സ്‌ഥാനത്തുനിന്ന്‌ ഒഴിഞ്ഞുനിന്നു. ആ കാലയളവിൽ എ. വിജയരാഘവനാണ്‌ സെക്രട്ടറിയുടെ ചുമതല നിർവ്വഹിച്ചത്‌.
കമ്മിറ്റിയിൽ 16 പേർ പുതുമുഖങ്ങളാണ്‌. എം.എം വർഗീസ്‌, എ.വി റസ്സൽ, ഇ.എൻ സുരേഷ്‌ബാബു, സി.വി വർഗീസ്‌, പനോളി വത്സൻ, രാജു എബ്രഹാം, എ.എ റഹീം, വി.പി സാനു, ഡോ. കെ.എൻ ഗണേഷ്‌, കെ.എസ്‌ സലീഖ, കെ.കെ ലതിക, പി. ശശി, കെ. അനിൽകുമാർ, വി. ജോയ്‌, ഒ. ആർ. കേളു, ഡോ. ചിന്ത ജെറോം എന്നിവരാണ്‌ പുതുതായി കമ്മിറ്റിയിലെത്തിയത്‌. 12 പേർ കമ്മിറ്റിയിൽനിന്ന്‌ ഒഴിവായി. പി. കരുണാകരൻ, വൈക്കം വിശ്വൻ, ആനത്തലവട്ടം ആനന്ദൻ, കെ.ജെ തോമസ്‌, എം.എം മണി, എം. ചന്ദ്രൻ, കെ. അനന്തഗോപൻ, ആർ. ഉണ്ണികൃഷ്‌ണപിള്ള, ജി: സുധാകരൻ, കോലിയക്കോട്‌ കൃഷ്‌ണൻനായർ, സി.പി. നാരായണൻ, ജെയിംസ്‌ മാത്യൂ എന്നിവരാണ്‌ ഒഴിവായത്‌.
