സൗദിയില്‍ വാഹനാപകടം കോഴിക്കോട്ടെ അഞ്ചംഗ കുടുംബം മരിച്ചു
റിയാദ്:
സൗദിയില്‍ മലയാളി കുടുംബം സഞ്ചരിച്ച വാഹനാപകടത്തില്‍ പെട്ട് കുടുംബത്തിലെ അഞ്ച് പേര്‍ മരിച്ചു. കോഴിക്കോട് ബേപ്പൂര്‍ സ്വദേശി മുഹമ്മദ് ജാബിറും, ഭാര്യയും മൂന്ന് മക്കളുമാണ് അപകടത്തില്‍ മരിച്ചത്. ഇവര്‍ സഞ്ചരിച്ചിരുന്ന കാര്‍ മറ്റൊരു സൗദി കുടുംബം സഞ്ചരിച്ചിരുന്ന കാറുമായി കൂട്ടിയിടിച്ചാണ് അപകടമുണ്ടായത്. മുഹമ്മദ് ജാബിര്‍ പാണ്ടികശാലകണ്ടി (45), ഭാര്യ ഷബ്‌ന മുഹമ്മദ് ജാബിര്‍ (36), ലൈബ മുഹമ്മദ് ജാബിര്‍ (7) സഹ മുഹമ്മദ് ജാബിര്‍ (7), ആണ്‍കുട്ടിയായ ലുത്ഫി മുഹമ്മദ് ജാബിര്‍ എന്നിവരാണ് മരിച്ചത്. മൃതദേഹം ബിഷക്കടുത്ത് അല്‍ റൈന്‍ ജനറല്‍ ആശുപത്രിയില്‍ സൂക്ഷിച്ചിരിക്കുകയാണ്. ദമ്മാമിനടത്തു ജുബൈലില്‍ നിന്നും ജിസാനിലെ അബ്ദുല്‍ ലത്തീഫ് കമ്പനിയിലേക്ക് ജോലി മാറി പോകുകയായിരുന്നു ഇവര്‍.
പുതിയ താമസ സ്ഥലത്തേക്ക് ആദ്യം വീട്ടുപകരണങ്ങള്‍ അയച്ചിരുന്നു. വസ്തുക്കള്‍ അവിടെ എത്തിയിട്ടും കുടുംബം എത്തിയില്ല. ഫോണില്‍ ബന്ധപ്പെട്ടെങ്കിലും കിട്ടാതായതോടെകുടുംബത്തെ കാണാതായി വാര്‍ത്ത പരന്നു. തുടര്‍ന്ന് നടന്ന അന്വേഷണത്തിലാണ് റിയാദില്‍ നിന്നും 198 കിലോമീറ്റര്‍ അകലെയുള്ള അല്‍ റൈനില്‍ അപകടം നടന്നിരുന്നതായി അറിയുന്നത്. അപകടത്തില്‍ പെട്ടത് ഇവരാണെന്നും തിരിച്ചറിഞ്ഞു. അഞ്ച് പേരും സംഭവ സ്ഥലത്ത് തന്നെ മരിച്ചുവെന്നാണ് റിപ്പോര്‍ട്ട്. വാഹനം ഓടിച്ചിരുന്നത് ജാബിറായിരുന്നു. ജാബിറിന്റെ കുടുംബങ്ങള്‍ സൗദി അറേബ്യയിലുണ്ട്.
