പുസ്തകാസ്വാദന മത്സരവും വനിതാ സംഗമവും നടത്തി
വെഴുപ്പൂർ സർഗ്ഗവേദിയുടെ ആഭിമുഖ്യത്തിൽ വനിതകൾക്കായി പുസ്തകാസ്വാദന മത്സരം സംഘടിപ്പിച്ചു. കരിങ്ങമണ്ണ അംഗനവാടിയിൽ നടന്ന മത്സരത്തിൽ പതിനെട്ടു വയസ്സു മുതൽ അറുപത്തിയഞ്ച് വയസ്സു വരെ പ്രായമുള്ള വനിതകൾ പങ്കെടുത്തു. ബഷീർ, ഒ.വി. വിജയൻ, എം.ടി. വാസുദേവൻ നായർ എന്നിവരുടെ കൃതികൾ ഈ കാലഘട്ടത്തിലും പുനർവായിക്കപ്പെട്ടത് ചർച്ചക്ക് വിധേയമായി. താമരശ്ശേരി, ഓമശ്ശേരി പഞ്ചായത്തുകൾ കേന്ദ്രീകരിച്ചു കൊണ്ട് ഓഗസ്റ്റ് 15ന് നടത്തുന്ന വനിതാ ശാക്തീകരണ പരിപാടിയായ കിത്താബ്-2023 ന്റെ മുന്നോടിയായി നടന്ന ഈ പരിപാടി മികച്ച സ്ത്രീ പങ്കാളിത്തം കൊണ്ട് ശ്രദ്ധേയമായി. സീന ദിലീഷ്,ശ്യാമള വെഴുപ്പൂർ, ഹസ്ന ഉസ്മാൻ, അൻസില അമ്പലമുക്ക് എന്നിവർ സമ്മാനർഹരായി. പരിപാടി എഴുത്തുകാരിയും അധ്യാപികയുമായ നിഷ ആന്റണി ഉദ്ഘാടനം ചെയ്തു. സീനത്ത് വെഴുപ്പൂർ അധ്യക്ഷത വഹിച്ചു. ചടങ്ങിൽ താമരശ്ശേരി പഞ്ചായത്ത്‌ അംഗം ഷംസിത, ഓമശ്ശേരി പഞ്ചായത്ത്‌ അംഗം ഷീജ ബാബു, സരിത ടീച്ചർ, അഞ്ജു ടീച്ചർ, ദിവ്യ. പി.എം, വിലാസിനി ടീച്ചർ, മുർഷിദ, ജംഷീറ എന്നിവർ സംസാരിച്ചു. ശ്യാമള വെഴുപ്പൂർ, അനുഷ,അസ്ന,സീന എന്നിവർ നാടൻ പാട്ടരങ്ങ് നടത്തി.
